भौतिक पुर्वााधार तथा यातायात मन्त्रालयका सचिव तुलसी प्रसाद सिटौलाले सरकारले सडक सुरक्षा सम्बन्धि १० वर्षे कार्यक्रम तत्काल कार्यान्वनमा लैजाने बताएका छन् । नेपाल अटो पत्रकार संघले आयोजना गरेको तीन महिने सडक सुरक्षा तथा जनचेतना कार्यक्रम सुभारम्भ गर्दै सिटौलाले सरकारले सडक सुरक्षाका लागि १० वर्षे कार्ययोजना लागू गरेर अघि बढ्ने बताए ।
सडक दुर्घटना न्यूनीकरण गर्न सरकारले विशेष ध्यान दिने सचिव सिटौलाको भनाइ थियो ।
उनले आफ्नो सुरक्षा प्रति सडक र सवारी प्रयोगकर्ता सचेत बन्नुपर्नेमा जोड दिए । उनले सडक दुर्घटना कम गर्न सबै निकायले हातेमालो गरेर अघि बढ्नुपर्ने बताए ।
कार्यक्रममा महानगरीय ट्राफिक महाशाखाका प्रहरी नायव महानिरिक्षक उपेन्द्र कान्त अर्यालले ९० प्रतिशत सडक दुर्घटना मानवीय कारणले हुने गरेको भन्दै त्यसतर्फ सबै सजग हुनुपर्नेमा जोड दिए । उनले सडक आफैं दुर्घटनाको कारक नहुने भन्दै यसलाई न्यूनिकरण गर्न सबै सचेत हुनुपर्नेमा जोड दिए ।
कार्यक्रममा नेपाल अटोमोवाइल डिलर्स एसोसियसन (नाडा)का महमसचिव दीपक थापाले नाडाले लामो समयदेखि सडक सुरक्षाको काम गर्दै आएको भन्दै यस क्षेत्रमा काम गर्ने सबैसँग सहकार्य गर्न तयार रहेको बताए । यस्तै नाडाका कोषध्यक्ष कृष्ण दुलालले सडक सुरक्षामा सबै सरोकारवालाले ध्यान दिए दुर्घटना कम सकिने भन्दै यस तर्फ सबै निकाय जिम्मेवार हुनुपर्नेमा जोड दिए ।
संघले गर्ने तीन महिने कार्यक्रम आजैबाट सुरु भएको र देशका विभिन्न स्थानमा यो कार्यक्रम विस्तार गर्दै जाने संघका अध्यक्ष उज्वल जंग शाहले जानकारी दिए । उनले सडकको समस्या सडकबाटै समाधान खोज्न जोड दिए । संघले सडक सुरक्षा बारे सरोकारवाला निकायसँग अन्र्तक्रिया गर्ने, हर्न निषेधित क्षेत्र बनाउन पहल गर्ने, ट्राफिक नियमबारे प्राथमिक तहका विद्यार्थीलाई जानकारी दिने लगायतका कार्यक्रम सार्वजनिक गरेको छ ।
No comments:
Post a Comment